27.05.1998
Иако e-mail-от е несомнено побрза, попрактична и практично бесплатна пошта на 21 век, јас, како непоправливо старински човек, сè уште повеќе им се радувам на писмата. Особено кога ќе ме изненадат, како она од пред некој ден што ми го испрати од Германија г. Јосип Новак (денес – фра Албин, католички калуѓер од редот на Св. Фрањо), стар војнички другар од незаборавните дебарски денови. Ме видел човекот “кадросан” во белградско ВРЕМЕ, па не го мрзело да направи фотокопија од написот и да ми ја испрати, придружена со едно срдечно другарско потсетување на старите војнички денови. А на фотокопијата: мојот голем политички “пријател” – г. Арбен Џафери како изјавува: “Нè нема во симфонискиот оркестар! “, а карши него – јас (со двете уши), насмеан по обичај, му одговарам: “Не е точно! Има еден што свири на виола… “.
Ја читам и препрочитувам фотокопираната статија и размислувам за двете противпоставени политички философии што стојат зад овие две противпоставени изјави: што и да зборува г. Џафери, тој мисли само едно – да ја дели Македонија на наша (според него, без срам и перде, “славомакедонска”) и нивна (името, како што е познато, не смее да им се изговори од причини на политичкиот бонтон наследен од Уставот од 1974).
За него очигледно и симфонискиот оркестар (веројатно намерно не сака да каже “Македонската филхармонија”) е институција како и секоја друга, во која неговиот народ мора да биде застапен процентуално, според бројот во вкупното население на земјата. За мене, филхармонијата е колектив од врвни уметници што во него не влегуваат ни како Македонци, ни како Руси (а има и руски Евреи), ни како Срби (ги има и нив!), туку само и единствено како уметници. Воопшто не се сомневам дека сонародникот на г. Џафери, симпатичниот свирач на виола во Македонската филхармонија, тешко би се навредил кога некој би му рекол оти во оркестарот не е поради своите музички квалитети, туку само и единствено за да ја претставува партијата на г. Џафери, на г. Алити или на некој друг џентлмен од истото племе.
Не, г. Џафери, тоа младо момче добро знае дека не влегло во оркестарот по национална, а уште помалу по партиска линија. Влегло зашто убаво свири на виола. И не само што свири, туку, гледам дека и ужива во своето свирење и по малу му заблазувам. (Ем работи, ем ужива. Веројатно би уживал уште повеќе да го плаќаат малу повеќе! Но, тоа излегува од темата што си ја зададов тука!) И добро е што е така. Тој млад господин не свири во оркестарот како претставник на својот народ, туку како уметник и како таков го слушаме и му аплаудираме. Така е и така мора да биде!
Или, да земеме еден друг пример, во обратна насока: борачите може (и секако треба) да бидат почесто од вашиот (без оглед на бројната застапеност во популацијата), а не од мојот народ од простата причина што се подобри пеливани од нас. Кога Трстена го освои својот незаборавен олимписки медал, не верувам дека имаше макар и само еден човек од мојот народ што не се радуваше на неговиот успех. Така е и така мора да биде!
Ќе биде зло и за земјава и за сѐ во неа ако биде по ваше! А, ако вчера во МАНУ фативте да зборувате по вашки за да докажете дека таму нема ниеден “вашинец”, нималу не би се изненадил утре да фатите да барате Мендух Тачи или Абдурахман Алити да игра во нашиот балет за и во него да има претставници од вашиот народ. Звучи можеби претерано, но – тоа е вашата логика. Ако, не дај Боже, ви успее, јас, еве, јавно ветувам дека веќе нема да одам на балет, иако многу го сакам.
Во едно друго време (во “социјализмот”), кога ќе го прашаа некој припадник на вашиот народ: “Кој работи во државната служба?”, одговорот му беше како добар виц: “Македонците и глупавите Шиптари!”. Тоа не го измислив јас. Така одговараа вашите луѓе. Зашто државната (лошо платена) служба не им се исплатеше. Сега, според вашите кажувања, излегува дека таму ги нема против нивната волја. Дека некој намерно ги спречил да бидат чиновници. За чудо, на големите демагози секогаш им се верувало. Така било и така е и денес! Дури и нешто повеќе: им се верувало и им се верува многу повеќе одошто на оние што ја говорат вистината.
За моиве написи на страниците на ДНЕВНИК секојдневно добивам пофалби од читателите (и по некоја покуда од госпоѓа Неџмие или некој неквалификуван бравар од вашиот народ). Се јавуваат по телефон, ми испраќаат писма, некои од моите написи ги открив репродуцирани на ИНТЕРНЕТ (единствено ме нема на страниците на органот на ССРНМ, иако тој сè уште не е во ваши раце) итн. итн. Сите знаат кој сум и на која партија ѝ припаѓам.
Па сепак, прашајте го г. Александар Тортевски (кој и самиот пишува многу – и тоа многу добро! – за “македонцките работи”) колку пристапници добива дневно Лигата за демократија. И споредете ги со бројот на пристапниците што “на невидено”, на “жими мајка” ги добиваат алтернативните демократи: по 300 дневно! (Ако продолжат така, додека да направат партиска програма, сите ќе нè зачленат во својата аптернатива! Само, што алтернатива ќе биде тоа? Алтернатива на што. Тоа, верно, ни денес не се знае, само – кој те прашува!). Така му веруваа (таму горе, “у једној земљи сељака, на брдовитом Балкану”) и на Радован Караџиќ, па видовте до кое дереџе дојде таа земја. Сега е сосема сеедно дали ќе го екстрадираат, дали ќе го судат, дали ќе го осудат. Изгинаа стотици илјади луѓе. Два и пол милиони се раселени! Босна од најпросперитетен дел на нашата поранешна заедничка татковина, падна далеку, далеку под рамништето на Македонија и така ќе биде уште долго.
Зошто ова го кажувам? Па затоа што сѐ започна со наивните процентуални пресметки (слични на оние на г. Џафери): вие сте толку, а ние волку, вас ве има таму, нас нè нема ваму… А и од една друга причина: во штотуку започнатите предизборни пазарења, некои лидери изјавија дека, ако победат, во нивната влада нема да има министри од задолжителната националност (да не речам која), други, напротив, однапред ветуваат министерски места. И овојпат мислам дека првите се во право, а вторите тешко грешат. Еве зошто!
Сѐ додека припадниците на таа националност очекуваат (како во добрите стари комунистички времиња) министерски места по клуч, тие нема ни со прст да мрднат за да се интегрираат во институциите на системот на Македонија. Кога партиите што победуваат на изборите ќе фатат (конечно и со полно право!) да ги игнорираат националните клучеви, па министерски места ќе им обезбедуваат само на своите коалициони партнери, некогашните зависници од клучевите ќе сфатат (се надевам) дека има само еден начин да станат власт: а тоа е – да влезат и да станат активисти на граѓанските, а не исклучиво на”своите” етнички партии.
Се сеќавам, пред некое време еден од министрите по клуч изјави за некој болгарски весник дека било невозможно неговата етничка група да се интегрира во Македонија. Аферим, ефенди! А и зошто да се трудите: вака или онака министерските места по клуч не ви гинат.
Под такви околности, на малите македонски партии им останува само една шанса за влегување во парламентот: да го следат светлиот пример на македонските Египтјани, па да се декларираат за Марсовци, Меркуријанци или Венеријанци (а кој може да им забрани?), па, како такви, да добијат квота за влегување во собранието. Е, дури тогаш ќе ја бидне жална ми Македонија!
###
Сакате да продолжите со читањето на останатите 319 колумни? Обезбедете си примерок
Оваа колумна е само една 319-те издадени во збирката наречена едноставно „Колумни“. Оваа книга како и сите останати во издание на Фондацијата Ѓорѓи Марјановиќ не се продаваат на „традиционален“ начин туку се добиваат како благодарност за вашата донација. Финансиските средства обезбедени од донациите ќе бидат употребени за помош при школување и вработување на деца без родители, што е една од нашите стратешки определби.
Инструкции за нарачување
За да ја добиете оваа книга, кликнете на копчето Донирај во горниот десен агол и во полето за забелешка наведете ја адресата на која сакате да ви биде доставена книгата. Донирајте износ по Ваш избор во Фондот за школување на Фондацијата Ѓорѓи Марјановиќ а ние книгите заедно со автограмот од авторот ќе ги доставиме на Вашата домашна адреса. При нарачката, во полето Белешка за нарачката, задолжително наведете „Колумни“.
Забелешка: Можете да донирате износ по ваш избор но не помал од 1500 ден + поштарина. Поштарината за испорака во Македонија изнесува 130 денари. За испорака надвор од Македонија, ве молиме контактирајте нé претходно.