Скопје, 26.03.2026 – Педагошкиот факултет „Св. Климент Охридски“ – Скопје, во тесна соработка со четирите најголеми здруженија на просветни работници (Сојузот на просветни работници на РСМ, здруженијата од Скопје и Куманово и Здружението „Учител“), а со поддршка на Фондацијата „Ѓорѓи Марјановиќ“ и „Просветно дело“ – Редакција „Детска радост“, одржа стручното советување „Читањето во ерата на екраните – битка помеѓу алгоритмите и книгата“.
Настанот, организиран по повод 80 години од првиот македонски буквар и списание за деца, понуди серија стручни презентации за предизвиците на современото образование. Посебен акцент беше ставен на влијанието на вештачката интелигенција и дигиталните содржини врз читањето со разбирање.
Фондацијата „Ѓорѓи Марјановиќ“, како поддржувач на овој научен и стручен собир, преку излагањето на Александар Марјановиќ го презентираше Натпреварот по раскажување – иницијатива која веќе дава конкретни резултати во враќањето на фокусот кон книгата и говорното изразување.
„Ова не беше само настан, туку почеток на поширок фронт за зачувување на љубовта кон книгата кај најмладите,“ истакнаа организаторите од Педагошкиот факултет и здруженијата на просветни работници од Скопје и Куманово. Поради големиот интерес, најавени се дополнителни термини за обука и вмрежување.
